Mae Porth Gwyrdd, partneriaeth rhwng Antur Cymru, Foothold Cymru, PLANED a Menter Gorllewin Sir Gâr, wedi lansio nifer cyfyngedig o grantiau cyflogaeth gynhwysol ar gyfer 2026, sydd ar gael i gyflogwyr sydd wedi’u lleoli yn Sir Gaerfyrddin, Ceredigion, Sir Benfro a Powys.
Bydd y grantiau’n cefnogi busnesau i gysylltu â thalent ifanc frwdfrydig tra’n adeiladu gweithlu mwy amrywiol a chynaliadwy. Drwy greu cyfleoedd cyflogaeth gynhwysol, nod y rhaglen yw helpu cyflogwyr i gryfhau eu sefydliadau wrth gyfrannu’n gadarnhaol at gymunedau lleol a’r trawsnewid i economi wyrddach.
Mae Porth Gwyrdd, sy’n cael ei ariannu gan y Cynllun Asedau Segur ac yn cael ei ddosbarthu gan Gronfa Gymunedol y Loteri Genedlaethol, yn gweithio gyda busnesau i ddatblygu cyfleoedd ystyrlon i bobl ifanc ag anableddau a’r rhai o gefndiroedd lleiafrifoedd ethnig, tra’n helpu sefydliadau i wreiddio cynaliadwyedd, tyfu’n gyfrifol, a meithrin y sgiliau sydd eu hangen ar weithlu’r dyfodol.
Drwy’r rhaglen grantiau, bydd busnesau sy’n cymryd rhan yn derbyn cymorth ariannol ac ymarferol i groesawu pobl ifanc rhwng 16 a 30 oed i’w sefydliadau, gan eu galluogi i ennill profiad gwaith gwerthfawr tra’n cyfrannu syniadau newydd, egni a safbwyntiau ffres i’r gweithle.
Dywedodd Emma Taylor, Rheolwr Ymgysylltu a Chymorth Cyflogwyr Porth Gwyrdd:
“Mae hwn yn gyfle gwych i fusnesau ledled Canolbarth a Gorllewin Cymru gael mynediad at gyllid i dyfu eu gweithlu tra’n derbyn pecyn o gymorth i’w helpu i ddod yn gyflogwyr mwy amrywiol ac yn fwy cynaliadwy yn amgylcheddol.”
Gan fod nifer cyfyngedig o grantiau ar gael, anogir busnesau i gofrestru eu diddordeb nawr er mwyn derbyn rhagor o wybodaeth am gymhwysedd a sut i wneud cais.
I gael rhagor o wybodaeth neu i gofrestru diddordeb, dilynwch y ddolen isod, neu cysylltwch ag Emma Taylor yn etaylor@anturcymru.org.uk