Mae mwy na 60 o bobl ifanc bellach wedi cofrestru gyda Porth Gwyrdd, tra bod 21 o gyflogwyr ledled Canolbarth a Gorllewin Cymru wedi creu swyddi newydd gyda chymorth grantiau gwerth hyd at £5,500.
Mae busnesau a sefydliadau’r trydydd sector ledled Sir Gaerfyrddin, Ceredigion, Sir Benfro a Phowys yn cael eu hannog i ddarganfod sut y gall Porth Gwyrdd eu helpu i ddod â thalent newydd i’w timau.
Mae Porth Gwyrdd yn cynnig grantiau cyflogwyr gwerth hyd at £5,500, gan helpu sefydliadau cymwys i dalu costau cyflogi person ifanc rhwng 16 a 30 oed ar y Cyflog Byw Gwirioneddol am hyd at 16 awr yr wythnos.
Er mwyn bod yn gymwys i gael cymorth, rhaid i sefydliadau naill ai fod yn sefydliadau amgylcheddol, neu fod yn gweithio’n weithredol i wneud eu gweithrediadau eu hunain a’r ffordd y maent yn darparu eu gwaith yn fwy cynaliadwy yn amgylcheddol.
Gall hyn gynnwys sefydliadau sy’n ceisio lleihau gwastraff neu allyriadau carbon, gwella eu harferion amgylcheddol, cyflwyno ffyrdd mwy cynaliadwy o weithio, neu ddatblygu eu heffaith amgylcheddol ochr yn ochr â chreu swydd newydd.
Mae’r grantiau wedi’u cynllunio i helpu i leihau rhai o’r rhwystrau ariannol sy’n gysylltiedig â chreu swyddi newydd, gan roi cyfle i fusnesau bach a sefydliadau’r trydydd sector cymwys ehangu eu timau wrth greu cyfleoedd cyflogaeth ystyrlon i bobl ifanc.
Mae Porth Gwyrdd yn darparu cymorth drwy gydol y broses, o ddatblygu swydd addas a chyflwyno cais i recriwtio a sefydlu’r gweithiwr newydd. Gall cyflogwyr hefyd gael cymorth gyda recriwtio cynhwysol, addasiadau yn y gweithle a chreu gweithlu mwy amrywiol a hygyrch.
Caiff Porth Gwyrdd ei ddarparu drwy bartneriaeth rhwng Antur Cymru, Foothold Cymru, Menter Gorllewin Sir Gâr a PLANED. Mae’r prosiect yn helpu pobl ifanc a chyflogwyr ledled Canolbarth a Gorllewin Cymru i ddod ynghyd drwy gyfleoedd sy’n cyfrannu at ddyfodol gwyrddach a mwy cynhwysol.
Un sefydliad sydd wedi elwa o’r cynllun yw WellMama CIC, cwmni buddiannau cymunedol wedi’i leoli yn Sir Benfro sy’n darparu addysg, arferion llesiant a phrosiectau cymunedol sy’n cefnogi llesiant mamau.
Defnyddiodd WellMama grant gan Porth Gwyrdd i gyflogi Cydlynydd Cynorthwyol ar gyfer ei Gardd y Mamau, gan helpu’r sefydliad i ehangu ei adnodd cymunedol Wellbeing Wednesday.
Dywedodd Samara Hawthorn, Sylfaenydd a Chyfarwyddwr WellMama:
“Pan glywais am Porth Gwyrdd am y tro cyntaf, roeddwn i’n rhyfeddu’n llwyr fod rhywbeth fel hyn yn bodoli – ac yna’n falch iawn o sylweddoli ein bod yn bodloni’r meini prawf. Roedd Emma o Borth Gwyrdd yn hynod o gymwynasgar. Gwnaeth hi fy arwain drwy’r broses gyfan ac roedd bob amser yn cyfathrebu ac ar gael i ateb cwestiynau ac egluro unrhyw gamau.”
Dywedodd Katherine, a ymunodd â WellMama fel Cydlynydd Cynorthwyol Gardd y Mamau drwy’r cynllun:
“Roedd Porth Gwyrdd yn galluogi WellMama i ariannu fy nghyflogaeth yma ac i mi dderbyn cyflog am yr hyn rwy’n ei wneud. Bellach, gallwn ehangu ein presenoldeb ar-lein, sefydlu cynllun aelodaeth, a ffurfioli ein diwrnodau agored i famau drwy ein sesiynau WellMama Wednesdays.”
Gyda mwy na 60 o bobl ifanc bellach wedi cofrestru gyda’r prosiect, mae Porth Gwyrdd hefyd yn helpu pobl ifanc rhwng 16 a 30 oed i archwilio gyrfaoedd, ennill profiad a chael cymorth personol i symud tuag at gyflogaeth.
Mae’r prosiect yn canolbwyntio’n benodol ar gefnogi pobl ifanc a all wynebu rhwystrau ychwanegol i gyflogaeth, gan gynnwys pobl ifanc ag anableddau a’r rhai o gefndiroedd ethnig leiafrifol.
Dywedodd Emma Taylor, Rheolwr Cyflogaeth Porth Gwyrdd:
“Rydym yn ymfalchïo mewn gwneud y broses ymgeisio gyfan yn hygyrch ac yn hawdd ei dilyn. Rydym am glywed gan sefydliadau sydd eisoes yn gweithio i ddiogelu’r amgylchedd, yn ogystal â sefydliadau sy’n ystyried sut y gallant wneud eu gwaith eu hunain yn fwy cynaliadwy yn amgylcheddol.
“Gyda grantiau o hyd at £5,500 ar gael, rydym yn annog cyflogwyr cymwys i gysylltu â ni a chael sgwrs am sut y gallwn eu cefnogi i greu swydd newydd, dod â thalent ifanc i’w sefydliad a chymryd cam arall tuag at ddyfodol mwy cynaliadwy.”
Ariennir Porth Gwyrdd drwy’r Cynllun Asedau Segur a chaiff y cyllid ei ddosbarthu gan Gronfa Gymunedol y Loteri Genedlaethol.
